काठमाडौं १७ साउन
सौर्य एयरलाइन्सको जहाज दुर्घटनामा घाइते भइ काठमाडौं मेडिकल कलेज सिनामंगलमा उपचाररत पाइलट मनीषरत्न शाक्यलाई अस्पतालले डिस्चार्ज गर्ने तयारी गरेको छ ।
स्वास्थ्यमा सुधार हुँदै गएपछि अस्पतालले शाक्यलाई डिस्चार्ज गर्ने तयारी गरेको अस्पतालका निर्देशक प्राडा मीना थापाले जानकार दिइन् ।
पाइलट शाक्य सामान्य हिँडडुल गर्न सक्ने भएको थापाको भनाइ छ । हड्डी भाँचिएका कारण शाक्यले फलोअप भने गरिरहनु पर्ने उनले बताइन् ।अस्पतालले डिस्चार्ज लिन सक्ने भने पनि शाक्यको परिवारले भने निर्णय गरिसकेको छैन ।
जहाज दुर्घटनामा शाक्यको अनुहार, आँखा, नाक र टाउकामा चोट लागेको थियो । साथै ढाडको एउटा हड्डीका साथै देब्रेपट्टिका तीनवटा करङ भाँचिएका छन् ।
गत बुधबार काठमाडौंबाट पोखरा जान लागेको सौर्य एयरको बिमान दुर्घटनामा परेको थियो । दुर्घटनामा १८ जनाको ज्यान गएको थियो । पाइलट शाक्यको भने सकुशल उद्धार भएको थियो ।
